Дали ќе има PayPal во Македонија за македонските претприемачи?
Во една од најсилните економии во светот, таа Македонската, заклучно со денес нема можност нашите претприемачи и стопанственици да се отворат кон светот преку прием на пари со PayPal сметка за електронска трговија.
Зошто е ова битно? Македонија увезува многу повеќе отколку што извезува и тој јаз се зголемува кај реалниот бизнис.
Македонските фирми и претприемачи се мали и слаби да отвораат скапи маркетинг и продажни канали низ светот. За ваквите земји и економии од посебно значење е електронската трговија и можноста странските купувачи да може да плаќаат безбедно за македонските производи и услуги со безбедни платежни платформи каква што е PayPal. На сликата е прикажан процесот на купување преку електронска продавница.
Ако ја погледнеме листата на земји кај кои PayPal сервисот за трговци не е овозможен, точно ќе лоцираме и степенот на развиеност на економиите во државите и слободата во креирањето и водењето бизнис. Повелете листа: Afghanistan, Pakistan, Bangladesh, Uzbekistan, Iran, Iraq, Lebanon, Libya, Liberia, Syria, Palestine, Belarus, Cameroon, Central African Republic, Kosovo, Ivory Coast, Republic of North Korea, Gabon, Ghana, Equatorial Guinea, Haiti, Macedonia, Monaco, Moldova, Myanmar, Montenegro, Nigeria, Paraguay, Saint Lucia, Sudan, Timor-Leste и Zimbabwe. Прекрасно друштво имаме. Веројатно тоа и си го заслужуваме, ако не покренеме иницијатива.
Не сакам да поверувам дека имајќи Министерство за информатичко општество речиси 10 години, плаќаме службеници и министри кои се шепурат по медиуми, годишни буџети од 10+ милиони евра, нашата Влада во заминување намерно да го кочи овој развој. Исто така не сакам да поверувам дека нашите банки со мрсни профити создадени од работата и маката на македонските стопанственици и граѓани – го кочат овој процес.
Ако воведувањето на PayPal или друг светски признат платежен процесор не е на агендата во програмата на новата Влада, лично ќе покренам иницијатива за воведување на PayPal во Македонија. Нема да ми биде прв пат да покренувам иницијативи што сметам дека се корисни за општеството. Сигурно нема да ми биде ни последен пат.
Сепак верувам дека економскиот и финансискиот тим на новата влада ќе го воведе PayPal уште во првите 100 денови од својата работа. Нашите умни, работливи и чесни граѓани заслужуваат да имаат излез на “море” што се нарекува светски пазар – без да бидат уценувани од државни органи, парапартиски рекетари и непазарно ориентирани банки.
Ве молам да ја прошириме веста за да создадеме критична маса на интерес и да го свртиме вниманието на оваа значајна работа за сите нас. Ви благодарам!
Венко Глигоров основач на Логин Системи