Вучиќ: Србија оваа година ќе произведува руски и кинески вакцини против Ковид-19

Претседателот на Србија, Александар Вучиќ и министерот без ресор Ненад Поповиќ објавија дека до крајот на оваа година во Србија ќе започне производството на кинеската вакцина на Синофарм и руската Спутник V.

Вучиќ производството на кинеската вакцина ја објави од Абу Даби каде договори изградба на заедничка фабрика со Кина, а почетокот на производството се очекува на 15 октомври.

Додека производството на руската вакцина Спутник V ја најави српскиот министер без ресор Ненад Поповиќ, по разговорот со рускиот министер за индустрија и трговија Денис Мантуров, а првата фаза на производството односно пакувањето на Спутник V треба да почне до 20 мај.

Вучиќ изјави дека во рок од две недели ќе биде организирано „јавно потпишување“ и дека станува збор за „целосно гринфилд“ проект на нова фабрика за вакцини на Синофарм.

-Ќе имаме големи количества вакцини за нас, но и за целиот регион, а она што го научив вечерва е дека ќе мораме, макар и по самата цена на чинење, да даваме вакцини во регионот бидејќи тоа што ние ќе ги излечиме нашите луѓе и ќе делуваме превентивно не вреди ако има проблем во регионот, изјави Вучиќ за РТС.

error: Content is protected !!